Analisti amerikan: Çfarë ka bërë e çfarë do të bëjë Joe Biden për shqiptarët

David L. Phillips, drejtori i Programit për Ndërtimin e Paqes dhe të Drejtat e Njeriut në Institutin për Studimin e të Drejtave të Njeriut në Universitetin Columbia në New York, ka thënë se shqiptaro-amerikanët kanë nevojë për një administratë në Uashington që i mbështet ata.

Ai për këtë ka thënë se duhet të votohet kandidati demokrat për president Joe Biden, përcjell Bota sot.

Phillips, për shkrimin e tij, është bazuar në deklaratën e Bidenit, të publikuar dhjetë ditë më parë me titull “Vizioni i Joe Biden për Shqipërinë dhe Kosovën”.

Aty pohohet se çka ka bërë dhe çka do të bëjë Biden për Kosovën dhe Shqipërinë.

Në vazhdim shkrimi i plotë i Phillips:

Ajo që Joe Biden ka bërë dhe do të bëjë për shqiptarët

Po i përgjigjem një letre nga Valentino Lumaj, e cila u botua nga Illyria më 29 Tetor. Teksti im mbështetet në një deklaratë zyrtare të lëshuar nga fushata e Joe Biden dhjetë ditë më parë me titull “Vizioni i Joe Biden për Shqipërinë dhe Kosovën”. Deklarata, e cila mund të gjendet në faqen zyrtare të Fushatës Biden, përshkruan historikun e Bidenit mbi çështjet shqiptare. Aty gjithashtu pohohet se çfarë do të bëjë Biden kur të zgjidhet President.

Çfarë ka bërë Joe Biden:

Si senator, Joe Biden ishte një zë i shquar në Kongres duke qëndruar në këmbë ndaj agresionit të Millosheviçit. Ai mbrojti interesat e Kosovës kur fokusi i botës ishte diku tjetër:

Joe Biden prezantoi rezolutën e vitit 1999 që autorizoi Presidentin Clinton “për të kryer operacione ajrore ushtarake dhe sulme raketore kundër Republikës Federale të Jugosllavisë (Serbi dhe Mal i Zi.)” Ai mobilizoi mbështetjen për fushatën ajrore të NATO-s dhe për përgjigjen humanitare ndaj spastrimit masiv etnik të Millosheviçit ndaj kosovarëve derisa u zhvillua fushata.

Joe Biden mbështeti – dhe e ka mbrojtur me vendosmëri – pavarësinë e Republikës së Kosovës, e cila është e pakthyeshme dhe në përputhje me të drejtën ndërkombëtare.

Joe Biden ka kërkuar drejtësi për krimet e luftës, duke përfshirë një llogari të plotë për personat e zhdukur dhe në mënyrë të përsëritur i bëri presion Presidentit Vuçiq për përparim në çështjen e vrasjes së vëllezërve Bytyqi. Ai gjithashtu u ka bërë presion vazhdimisht udhëheqësve politikë të rajonit mbi nevojën për të luftuar korrupsionin.

Joe Biden ka mbajtur interes të nivelit të lartë të SHBA në Kosovë, duke e vizituar dy herë, një herë si nënpresident në 2016, së bashku me gruan e tij dhe anëtarët e tjerë të familjes. Ai inauguroi rrugën në Kosovë, me emrin e djalit të tij të ndjerë “Beau Biden”, i cili shërbeu si këshilltar ligjor në Kosovë.

Çfarë do të bëjë Joe Biden:

Kthimin e qëndrimit të ç’ekuilibruar të Administratës Trump ndaj Kosovës dhe Serbisë, duke rivendosur drejtësinë dhe barazinë në marrëdhëniet dhe duke punuar drejt një bashkëpunimi më të madh.

Punë në partneritet me Bashkimin Evropian për të ringjallur dialogun ndërmjet Kosovës dhe Serbisë me qëllim të lehtësimit të një zgjidhjeje stabilizuese, të drejtë dhe gjithëpërfshirëse midis dy vendeve që respekton integritetin territorial të Kosovës dhe arrin njohjen e plotë të ndërsjellë.

Këmbëngulje që drejtësia për krimet e luftës të ndiqet pa frikë dhe favor dhe të kërkojë përgjegjësi të plotë dhe të shpejtë të të gjithë personave të zhdukur, duke përfshirë çështjen e Vëllezërve Bytyqi.

Mbështet misionin NATO-KFOR, duke marrë vendime rreth vendosjes së trupave amerikane bazuar në interesat e sigurisë amerikane, jo llogaritjet politike.

Inkurajon BE-në të përmbush premtimin e saj për të dhënë liberalizimin e vizave për qytetarët e Kosovës dhe për të ndërmarrë hapa të tjerë për të çuar përpara integrimin e Kosovës në BE, përmes Marrëveshjes së Stabilizim-Asociimit.

Forcon marrëdhënien SHBA-Shqipëri duke rritur marrëdhënien tonë të mbrojtjes për të siguruar që Shqipëria mbetet një aleat i fortë i NATO-s, duke zgjeruar marrëdhëniet ekonomike dhe tregtare midis dy vendeve tona dhe duke zhvilluar biseda të sinqerta për të mbajtur të përgjegjshëm njëri-tjetrin kur nuk kemi idealet tona demokratike.

Mbështet Shqipërinë në rrugën e saj drejt anëtarësimit në BE. Kjo do të thotë të ndihmojmë Shqipërinë për të bërë reformat- duke përfshirë rendin e ligjit, anti-korrupsionin dhe reformat gjyqësore dhe zgjedhore – të kërkuara për të ecur përpara. Kjo gjithashtu përfshin punën për të siguruar që dyert e BE-së të mbeten të hapura për vende si Shqipëria kur të jenë gati.

Me partnerët dhe aleatët evropianë, ndihmon ekonomitë e shkatërruara të rajonit të rikuperohen nga pandemia dhe të ndërtojnë një të ardhme më të sigurt ekonomike.

Shqiptaro-amerikanët kanë nevojë për një administratë në Uashington që mbështet shqiptarët. Votoni për Joe Biden!

Sinqerisht,

David L. Phillips

Miku i shqiptarëve dhe mbështetësi i Biden

Leave a Reply

Your email address will not be published. Required fields are marked *